Attractions »

Philip Bence – Springbok

Tydens ʼn dinee gehou op Donderdag 3 Mei 2012 by die Kokerboom Motel, is medaljes aan bloedskenkers oorhandig. Elk van die medalje ontvangers het ʼn spesifieke hoeveelheid eenhede bloed geskenk.
Die verrigtinge is met ʼn gebed geopen waarna almal verwelkom is. Suster Stephanie Fourie, die Area Bestuurder van die SANBS, het ʼn oorsig gegee oor die Vrystaat/ Noordkaap area. Hul missie is om genoegsame kwaliteit bloed produkte vir mediese dienste op ʼn bekostigbare wyse in te samel. Die SANBS samel jaarliks 800 000 eenhede bloed in. Daar is jaarliks ʼn toename van bloedskenkers van ongeveer 60 000 mense. Daar word gemiddeld 2.14 eenhede bloed per persoon geskenk. Die skenkers bestaan uit 59% mans en 41% vroue. Dit is baie belangrik om na die skenkers om te sien en word hulle aangeraai om net 4 keer per jaar bloed te skenk. Daar is geen alternatief vir bloed nie. Daar was al ʼn poging om ʼn beesras te teel wat bloed vir menslike gebruik kon voorsien maar dit het nie gerealiseer nie.

Die belangrikheid van die inligting wat op die vorm verskaf word alvorens bloed geskenk word, is aan die gaste verduidelik. Indien ʼn skenker op medikasie is, moet dit spesifiek genoem word aangesien die ontvanger heel moontlik negatief sal reageer daarop. Elke eenheid bloed wat ontvang is, word deeglik getoets en geklassifiseer alvorens dit gestoor word. Daar is verduidelik hoe bloed geskei word in plasma, plaatjies en rooibloed selle. Bloed word gevries en het ʼn leeftyd van 42 dae. Die meeste bloed wat ontvang is, word vir geboortes en ginekologie gebruik. Gewoonlik is die hoogste gebruik in September maand.
Jana Wallace, Bemarking Bestuurder van die area, het gesê die skenkers is helde wat omgee vir hul mede mens. Sy het ʼn paar boodskappe van waardering, wat deur mense wat bloed ontvang het, voorgelees. Daar is gesê dat skenkers spesiale engele is. Die donateurs wat deurentyd bloed skenk is bedank vir hul lewens redding gebaar.

Die Tak se Insameling Bestuurder, Suster Ricky Diergaard, het verduidelik die satelliet stasie gesluit is weens koste effektiwiteit. Die logistiek het ook bygedra aangesien die bloed in Bloemfontein gestoor en dit moet binne 18 uur daar gelewer word. Springbok sal elke tweede maand besoek word en skenkers sal vooraf gekontak word. Skole sal ook besoek word want daar kan reeds vanaf 16 jarige ouderdom bloed geskenk word. Daar is ʼn teiken van 10 000 eenhede bloed vir die jaar gestel. Daar word ook ʼn teiken gestel vir elke besoek.
Mnr. Fielding het die gaste vertel hoe hy moes bloed ontvang tydens sy stryd teen prostaat kanker, hy is nou genees en het die skenkers bedank vir hul onbaatsugtige gebaar deur bloed te skenk.

Die oorhandiging van die medaljes het hierna plaasgevind. Die eerste kategorie is vir mense jonger as 26 jaar wat 20 eenhede geskenk het. Hulle was Clifton Engelbrecht, Gerrit en Albertus Nagel. Die mense wat medaljes ontvang het, het reeds 50 skenkings gegee. Hulle was Jacobus Kampfer, Gezina Engelbrecht, Johanna Hanekom, Ernst Groenewaldt, Jacobus Oelofse, Willem Thiart, Marianne De Waal, Jacobus van Dyk, David Friedberg, Linda Bloemhoff, Priscilla Smit en Gerrit Nagel.
In die kategorie vit 75 skenkings is Manie van der Linde, Jan Visser en Isak van Niekerk vereer.
Hilda Groenewald en Mario Brand het reeds meer as 100 skenkings gedoen en ook hul medaljes ontvang.

Ds Frederick Booysen was die enigste persoon wat meer as 125 skenkings gemaak het maar kon nie die geleentheid bywoon om sy medalje te ontvang nie.
Die geleentheid is afgesluit met ʼn heerlike ete waarna almal baie tevrede uitmekaar gegaan het.